🙏 श्रद्धांजलि रा सोरठा 🙏
नमन करुं जगन्नाथ, दीनी मानुष देह मम !
नित उठ जोडूं हाथ, गुण ना भूलूं राजवी !!
सिरै बिकाणो नाम, ऊजळ भारत देस मंह !
बसै चंगोई गाम, राजा श्री रघुनाथसीं !!
रयो विधाता रीझ, छः बेटा एक धीवड़ी !
मोय जनक ज्यां बीच, पंचमसुत सुरजानसीं !!
अग्रज तीन उदार, म्हैं सूं पैली जन्मिया !
लगतै चौथी वार, म्हनै विधाता भेजियो !!
संवत दोय हजार, अट्ठारा री रामनमी !
जन्म मिळयो संसार, मां शेखाणी मात सूं !!
ढाई बरस उपरांत, डसियो काळो नाग पितु !
बाळक हुया अनाथ, न याद छवि मो तात री !!
बड्यो विधाता अंग, सबनै छाती चेपिया !
राजा बृजलालसिंग , चंगोई गढ़ पाटवी !!
दो राणीसा संग, शेखाणी-भटियाणी इक !
पण बिधना रा रंग, कुंवर कुंवरी एक नीं !!
भटियाणी जी नेह कर सुत छाती चेपियो !
ईश्वर कृपा अथेह, नन्द जशोदा मो मिल्या !!
दोयेक बरसां बाद, भाई-सैण भेळा किया,
पुत्र वत अपणाय, नाम दियो मो आप रो !
पालण पोषण चाव, संस्कारी शिक्षा दिवी !
कोई नयीं अभाव , देख्यो वां रै राज मं !!
गढ़ी विधाता रीत, आया सो जाणों पड़ै !
तोड़ गया सब प्रीत, छोड गया सब रोंवता !!
नमन करै घनश्याम, बैकुण्ठां बैठ्या थकां !
हिरदै वां रो नाम , कदे न उतरै राजवी !!
घनश्यामसिंह राजवी चंगोई